URI përfaqëson Shqipërinë në Punëtorinë Rajonale të Planifikimit të GEF-9 në Chișinău

Nga 8-11 shtatori 2026, Instituti i Kërkimeve Urbane (URI), së bashku me Ministrinë e Mjedisit, përfaqësoi Shqipërinë në Chișinău, Moldavi, në Punëtorinë e Planifikimit të GEF-9 për Evropën Lindore dhe Azinë Qendrore. Punëtorinë e organizuan Global Environment Facility (GEF) dhe Ministria e Mjedisit e Republikës së Moldavisë dhe bashkoi përfaqësues nga 16 vende për të shqyrtuar prioritetet dhe mundësitë e ciklit të ri të financimit të GEF-9.

Shndërrimi i prioriteteve kombëtare në projekte

Për katër ditë, pjesëmarrësit diskutuan mbi mënyrat se si shtetet mund t’i shndërrojnë prioritetet kombëtare mjedisore në projekte që mund të bëjnë diferencën. Sesionet mbuluan:

  • Fushat fokale të GEF-it: biodiversitetin, ndryshimet klimatike, degradimin e tokës, ujërat ndërkombëtare, si dhe kimikatet dhe mbetjet
  • Programet e reja të integruara dhe instrumentet e financimit të GEF-9, përfshirë financimin e përzier (blended finance)
  • Bashkëpunimin: koordinim më të mirë mes institucioneve, përfshirje më të madhe të sektorit privat dhe mobilizim të më shumë fondeve

Ndarja e përvojës së Shqipërisë me e-Mobilitetin

URI prezantoi mësimet e nxjerra nga puna e vet në projekte para vendeve të tjera dhe palëve kryesore të interesuara. Së bashku me Ministrinë e Mjedisit dhe UNIDO-n, ndamë mësime praktike dhe metoda pune nga projekti e-Mobility. Pjesëmarrësit diskutuan gjithashtu se si kjo qasje mund të përshtatet dhe të përsëritet në vende dhe kontekste të tjera.

Shoqëria civile si partnere

Dita e tretë shqyrtoi çfarë mund të bëjnë organizatat e shoqërisë civile për projektet e GEF-it përtej marrjes së financimit. Pjesëmarrësit diskutuan se si OSHC-të ndihmojnë përmes ekspertizës teknike, njohurive dhe kapaciteteve vendore, si dhe ndarjes së praktikave të mira. Mbi të gjitha, OSHC-të përfshijnë komunitetet në punën për ndryshim të qëndrueshëm. URI e konsideron këtë thelbësore për punën e vet.

Drejt së ardhmes

URI falënderon GEF për katër ditë produktive dhe interaktive, që krijuan hapësirë për bashkëpunim, mësim të ndërsjellë dhe ide të reja. URI do të vazhdojë të punojë me institucionet kombëtare dhe partnerët rajonalë për të ndihmuar Shqipërinë që të përfitojë sa më shumë nga GEF-9.

GEF është familja më e madhe e fondeve në botë që i kushtohen mbrojtjes së mjedisit. Si mekanizëm financiar për gjashtë konventa shumëpalëshe, GEF-i mbështet përpjekjet e vendeve për të trajtuar shkaqet rrënjësore të degradimit të mjedisit, duke kontribuar në arritjen e objektivave globale për natyrën, klimën dhe ndotjen.

Gjatë tri dekadave të fundit, GEF-i ka qenë financuesi publik më i madh në fushën e mjedisit, duke siguruar mbi 27 miliardë dollarë amerikanë, kryesisht në formën e granteve, dhe duke mobilizuar 155 miliardë dollarë amerikanë shtesë për projekte prioritare të nisura dhe të zbatuara sipas nevojave të vendeve.

November 16, 2026